Estableceron como prioridade a realización de accións de avaliación da accesibilidade física e cognitiva de espazos públicos da cidade.
Este mes reuniuse o grupo 'Asesores' de Dano Cerebral Lugo, na que foi a primeira toma de contacto tralo parón do verán. O grupo está constituído por persoas con dano cerebral adquirido que xa teñen participado na Rede de Cidadanía Activa, refundándose con algúns membros máis, ata arredor de dez persoas.
O grupo conta co acompañamento da educadora social e da neuropsicóloga de Dano Cerebral Lugo, que apoian ás persoas con dano cerebral nas necesidades que poden xurdir durante as reunións. Porén, son eles e elas quen establecen prioridades e accións a desenvolver.
Polo momento decidiron centrarse na realización de accións de avaliación da accesibilidade física e cognitiva de diferentes espazos públicos da cidade. Ademais, está previsto que participen noutras actividades, charlas e proxectos que poidan ir xurdindo ao longo do ano.