Participa enviando un texto sobre a túa experiencia co dano cerebral adquirido a opina@fegadace.org.
FEGADACE conmemora o Día do Libro sorteando dez exemplares de Iridium, a novela de Francisco Castro protagonizada por unha rapaza con dano cerebral. Participa no sorteo e recibe por correo no teu domicilio un exemplar do libro, grazas á colaboración do escritor e da editorial Galaxia.
O sorteo está aberto desde hoxe!
Quen pode participar? Calquera persoa, aínda que as menores de idade ou que teñan a capacidade de obrar modificada deberán achegar unha autorización da súa titora ou titor.
Como? Enviando un pequeno texto sobre o dano cerebral adquirido (entre 100 e 300 palabras).
Que tipo de texto? Autobiográfico, testemuñal, literario, de denuncia... O que se che ocorra, sempre que teña que ver, dalgunha maneira, co dano cerebral adquirido. Non é preciso que teñas DCA ou que o teña calquera na túa contorna: tamén podes escribir unha reflexión sobre que acabas de coñecer o dano cerebral.
Que imos facer cos textos? Compartilos na sección de Testemuños da web e nas redes sociais de FEGADACE, para achegar máis e diferentes visións da nosa discapacidade. Participando no sorteo autorizas a súa publicación.
Onde? Pódese enviar ao enderezo opina@danocerebralgalicia.org ou por mensaxe directa aos nosos perfís en Facebook e Twitter.
Que prazo hai? Ata o 22 de abril, durante todo o día.
Cando se vai realizar o sorteo? O 23 de abril, Día do Libro, ás 9:00. A continuación notificarase ás persoas gañadoras e publicarase o resultado na nosa páxina web e redes sociais.
Para máis detalles, descarga aquí as bases do sorteo, e segue o hashtag #SorteoIridium.