Organizados tres cursos presenciais de catro horas e media en Ponteceso, Boqueixón e Xinzo de Limia.
FEGADACE elaborou, no marco do Proxecto Rumbo, un amplo manual formativo sobre 'Alimentación, deglutición e nutrición no dano cerebral adquirido'. Este documento está a ser a base dunha serie de formacións online e presenciais que pretenden mellorar a capacitación das coidadoras e coidadores, formais e informais, de persoas con dano cerebral adquirido. O ciclo de cursos presenciais culminou a súa programación o 14 de marzo, cunha sesión en Xinzo de Limia.
En concreto, a Federación organizou ata tres actividades formativas presenciais, en colaboración con diversos axentes. A primeira tivo lugar no IES Eduardo Pondal de Ponteceso o 26 de febreiro, e dirixiuse ao seu alumnado, da área sociosanitaria. A segunda foi no Concello de Boqueixón o 4 de marzo e tivo como obxectivo formar aos traballadores e traballadoras do Servizo de Axuda no Fogar. A última responde á colaboración de FEGADACE co CDR O Viso: aberta a profesionais, persoas usuarias e familiares do centro, tivo lugar en Xinzo de Limia o pasado xoves.
En total, FEGADACE formou en alimentación, deglutición e nutrición a 50 persoas, que tamén recibiron un manual no que consultar calquera dúbida en relación coas secuelas do dano cerebral adquirido nesas áreas. As docentes foron a terapeuta ocupacional Inés Mosquera e a logopeda Noelia Rivadas.
Os contidos, da alimentación e deglutición ás necesidades nutricionais e a medicación
As formacións, de catro horas e media de duración, comezan cunha presentación e características xerais do dano cerebral adquirido, para de seguido introducirse no tema da alimentación: secuelas específicas desta discapacidade, produtos de apoio e estratexias de posicionamento para comer. A seguir trátase a estrutura da deglutición e os diversos tipos de disfaxia, para logo pasar a falar de nutrición: grupos de alimentos, requirimentos de enerxía e nutrientes, hidratación, adaptación da dieta en casos de disfaxia e necesidades de suplementación no caso de ter esa secuela. Por último, a formación prevé un apartado de medicación: estratexias de adaptación das formas farmacéuticas, medicamentos manipulables e non manipulables, interacción entre fármaco e alimento e axentes texturizantes.
Os contidos foron elaborados por un grupo multidisciplinar composto por profesionais de FEGADACE e Asteria M. Luzardo Álvarez, Laura Sanjulián Fernández e Patricia Regal López, profesoras da Facultade de Ciencias do campus de Lugo da Universidade de Santiago de Compostela, no marco do convenio de colaboración que vincula a ambas entidades.
O ciclo de formacións presenciais contou coa colaboración da Escola Galega de Saúde para Cidadáns na organización. Ademais, contaron co apoio da Fundación La Caixa (Ponteceso), da Consellería de Política Social e Xuventude, dentro dos programas con cargo á asignación tributaria do 0,7% do IRPF -é dicir, grazas ás persoas que marcan ‘X Solidaria’ na súa declaración da renda- (Ponteceso e Boqueixón) e do Ministerio de Dereitos Sociais e Axenda 2030 grazas á súa inclusión no Proxecto Rumbo (Xinzo de Limia).
Proxecto Rumbo
O ‘Proxecto RUMBO: cara a un modelo de autonomía persoal conectada e inclusiva’ é unha iniciativa colaborativa desenvolta entre distintas confederacións do Terceiro Sector da discapacidade (COCEMFE, ASPACE, Impulsa Igualdad, FEDACE e AUTISMO ESPAÑA). O obxectivo é impulsar o deseño de modelos innovadores de apoio á autonomía persoal e a vida independente de persoas con discapacidade, especialmente aquelas con maiores necesidades de apoios, mediante a combinación de servizos e recursos que poidan facilitar unha forma de vida inclusiva na sociedade en condicións de seguridade, accesibilidade e benestar.
Este proxecto, que conta coa participación de 22 entidades destas confederacións repartidas en cinco comunidades autónomas, está financiado polo Ministerio de Dereitos Sociais e Axenda 2030, con cargo ao Plan de Recuperación, Transformación e Resiliencia do Goberno de España, ligado á súa vez aos fondos Next Generation da Unión Europea.