O grupo de traballo especializado contou coa presenza de profesionais de Dano Cerebral Galicia e Dano Cerebral Santiago de Compostela.
Dano Cerebral Estatal publicou o seu 'Caderno 24. Promoción da autonomía persoal e a vida independente das persoas con Dano Cerebral Adquirido e as súas familias a través do lecer inclusivo', un traballo realizado ao longo do ano 2025 a través de investigación, formación e desenvolvemento de metodoloxías comúns para fortalecer o lecer inclusivo dentro do movemento asociativo.
O lecer, un dereito para todas as persoas
O lecer, entendido como unha experiencia persoal, libre, pracenteira e socialmente significativa, constitúe un dereito recoñecido pola Convención sobre os Dereitos das Persoas con Discapacidade, así como por diversas normativas nacionais e internacionais. O seu exercicio efectivo require superar barreiras estruturais, actitudinais e comunicativas que aínda persisten, especialmente no caso das persoas con Dano Cerebral Adquirido, quen afrontan unha realidade complexa que transforma radicalmente o seu proxecto de vida.
Esta publicación constitúe unha guía metodolóxica completa para o deseño, implantación e avaliación de intervencións en lecer inclusivo. Estrutúrase en 5 capítulos:
- Conceptualización do lecer inclusivo dentro dos programas de atención a persoas con discapacidade e o seu marco normativo.
- Barreiras e necesidades das persoas con dano cerebral para o goce efectivo do lecer.
- Intervención individualizada, co deseño de plans persoais de lecer adaptados a intereses, capacidades e contexto vital.
- Intervención grupal con persoas con dano cerebral e as súas familias, incorporando dimensións relacionais, emocionais e comunitarias.
- Intervención comunitaria, con estratexias para articular redes locais, recursos públicos e entidades do territorio.
O caderno inclúe ademais recomendacións prácticas, bibliografía especializada e anexos con experiencias desenvolvidas por entidades do movemento asociativo.
O contido técnico foi coordinado por Rocío de la Rosa Díez, directora de Dano Cerebral Andalucía, e a Dra. Aurora Madariaga Ortuzar, Licenciada en Psicoloxía, Experta en Pedagoxía Terapéutica, Máster en Educación Especial e Doutora en Lecer e Potencial Humano pola Universidade de Deusto.
No proceso participaron profesionais de entidades de toda España:
Daño Cerebral Adacca Cádiz, Daño Cerebral Granada, Daño Cerebral Jaén, Daño Cerebral Adacema Málaga, Daño Cerebral Sevilla, Daño Cerebral Castilla-La Mancha, TraCe Catalunya, Daño Cerebral Invisible, Daño Cerebral ADACEA Alicante, Dany Cerebral Ateneu Castelló, Dano Cerebral Galicia, Dano Cerebral Santiago de Compostela, Dany Cerebral Rehacer Illes Balears y Daño Cerebral / Garuneko Gaitza Araba.
Un paso adiante na inclusión comunitaria
'Avanzando en DCA' é un documento que reforza o compromiso de Dano Cerebral Estatal coa promoción da autonomía persoal, a vida independente e a participación comunitaria das persoas con Dano Cerebral Adquirido, situando o lecer inclusivo como un dereito e un ámbito chave para a mellora da calidade de vida.
Coa publicación do novo caderno técnico, o movemento asociativo dispón dunha ferramenta estratéxica e consensuada que permitirá seguir avanzando na estandarización de intervencións e a creación de espazos de lecer realmente accesibles, significativos e comunitarios en todo o territorio.
Este programa está financiado a través das subvencións con cargo ao 0,7% do IRPF (actividades de interese xeral consideradas de interese social) do Ministerio de Dereitos Sociais, Consumo e Axenda 2030 do Goberno de España, e conta coa colaboración de Fundación ONCE.
- Descarga aquí o Caderno 24
- Descarga aquí o Caderno 24 en Lectura Fácil
Información extraída de Daño Cerebral Estatal.